曾在TVB處境劇《愛．回家之開心速遞》中飾演「艾頓壯」一角而成功入屋的焦浩軒（焦仔），甚有觀眾緣，一直被外界看好前景。隨着劇集迎来大結局，日前他上載了一段短片，公布最新去向：「九年幾嘅《愛回家》正式劃上句號！感謝呢個大家庭帶俾我嘅一切❤️完結係另一個新開始！唔知大家有冇留意到我又返番去最熟悉嘅《流行都市》呢？雖然暫時未有戲拍，但仍然可以以主持身份繼續見大家🥰🥰」

焦浩軒自言入行從沒想過被人認識，單純想做演員、做自己喜歡的工作，雖然他曾期待過有份參演新一輯《愛．回家之三代同糖》，但最後未獲安排入劇組：「當演員表出嘅時候發現，咦，冇我份喎，係擔心嘅，因為我知道我會失業。而真係，我已經36歲，我都好驚中年危機。好好彩，公司就畀咗另外一個機會我，畀我返返入去《流行都市》，雖然我3年冇做主持啦，但係又可以畀我搵返大王（安德尊），我希望有一日可以踢走佢！」

除了幕前工作之外，焦浩軒亦不停進修，更自爆其實一直有擔任健身教練：「我喺幾年前已經開始咗做健身教練啦，希望可以利用運動幫助唔同嘅人去改善佢哋嘅痛症，我亦都會繼續做呢樣嘢，希望遲啲會有更多機會等緊我！」不少忠實劇迷及網民紛紛留言為他加油打氣，大讚他後生靚仔，完全不似36歲，當中有網民好奇問道：「愛回家後都算有知名度，都怕冇監製搵嗎？」焦浩軒就回覆：「絕對怕，電影同劇集出產量一年比一年少🥺」