陪伴港人近10載的長壽處境劇《愛．回家之開心速遞》今個星期五播放最後一集，劇中經典CP「大小姐」林淑敏與「送水輝」許家傑日前接受東網專訪，大談殺青感受，家傑坦言愈接近尾聲，離愁別緒感覺愈濃烈，台前幕後不斷話當年及影大合照，甚有畢業禮的氛圍；而淑敏為免影響拍攝表現，一直刻意抑壓傷感情緒，但當拍攝「龍家」最後一個場景後，全體拍片錄製節日祝福語時，終忍不住淚崩。

林淑敏表示能夠參與《愛．回家》對她來說意義重大，並非單純為人工及曝光率，而是10年來陪着觀眾經歷香港的高低起伏，為大家提供娛樂：「好多人同我講我由細睇到你大，記得有次去餐廳，個侍應同我講：『我由小學開始睇你，到依家我讀大學。』我聽到好開心，個意義係陪住大家成長，我可以喺大家生命中有咁重要位置，係超脫咗演員演戲嘅意義。」她甚至揚言：「如果TVB話唔出糧畀你，要我磅番少少水畀公司，我都願意付出去換來呢個機會。」她稱這段回憶會一直留在心中：「只要一日未被遺忘，一日都唔會完結。」家傑希望將來觀眾遇到不快時，可以翻出劇集重溫，讓大家笑一笑。

兩人於2021年憑《愛．回家》奪得「最受歡迎電視拍檔」獎，就連劇外兩人也以劇中的角色名稱呼對方，甚至因太熟落而傳過緋聞，兩人笑言緋聞只是得啖笑，雙方關係已昇華至家人。10年以來，他們經歷種種，細數當中難忘事，家傑透露有次拍攝途中吃了豆腐火腩飯後身體嚴重不適，幸得對方相救：「我喺一個鐘頭內痾咗5、6次，嘔咗5、6次，導演話你面青口唇白，成件恤衫都濕晒，叫我唔好再拍，之後個胃抽筋到好似電擊咁痛，大小姐二話不說車咗我去醫院，最後要留院觀察一晚。」他稱當時非常辛苦，曾想過會否一命嗚呼。

能夠成為「最佳拍檔」，家傑認為全因兩人會互補不足：「有時我急得滯，大小姐會提我，佢唔想接觸嘅新話題，就由我去了解。」淑敏指兩人如此投契是因為大家都是從籍籍無名走過來，家傑直言：「我2009年入無綫，入行8年先入《愛．回家》，之前經歷過高高低低，演過好多冇名嘅角色，或者路過畀反應，有次叫我做沈震軒替身，其實當時都有少少覺得我做演員，點解要做替身，但有好多唔同經歷後，你會好珍惜每一次做戲。」而「送水輝」完全是一次無心插柳：「有個相熟導演話佢拍完最後一集《愛．回家》就會去外國工作，叫我嚟一齊玩，最初只係諗住客串一集，冇諗過一拍拍10年。」淑敏指對方的故事提醒，作為演員千萬不要推掉每一個好微少的角色，而她亦是由妓女、女鬼甚至角色「丙」做起：「做演員要腳踏實地，只要你畀心機，花時間落工作，係會有人睇到。」

淑敏更由衷表示相信家傑將來的成就遠不至止：「我睇過阿輝嘅正劇，實在出色，佢拍《機場特警》演宋天機，出色到《愛．回家》要寫番呢個角色出嚟，出色到歐陽震華傳短訊話佢係完美Carry呢個角色，一個咁有潛質嘅演員，希望佢可以上台接受獎項，喺台上多謝我，呢個係我最大心願。」家傑同樣對淑敏的工作態度讚不絕口，直指從對方身上獲益良多:「我學得最多嘅對象就係大小姐，我睇到佢嗰種堅持同專業，佢由第一集一直咬牙切齒到最後一集都冇放棄，因為人始終會有倦怠期，但佢冇，所以呢10年要多謝佢，佢嘅堅持同專注好難得，佢全程付出，係值得觀眾嘅掌聲同尊重。」又指對方多年以來的劇本都被她畫得全花，形容對方一直都是「咬緊牙關」度過這些年。淑敏自爆因為她有先天缺陷，要比別人多花幾倍努力：「我細個有讀寫障礙同專注力問題，加上我曾有過大病，因為我試過藥物性休克，搶救番之後有嚴重腦霧，所以我要花好多時間，但我係享受，有人咁錢做你鍾意做嘅嘢。」笑言若不是因為這個劇要背如此多對白，恐怕早已有老人癡呆。

對於未來的路，大家都不知道如何，淑敏坦言拍了10年處境劇，甚至不肯定自己是否還能應付正劇演出，但她承諾：「我出去會以新人嘅態度去接受新事物，因為發展得太快，又AI又短劇，但我哋初心唔可以變，一定要娛樂觀眾，你對觀眾好，觀眾就會睇你。」就正如家傑所言，要「Stay Hungry Stay Humble」（永遠保持求知若渴及謙卑的心）才是真理。