【娛樂新聞】周嘉洛朱敏瀚兄弟情如情侶 嘉洛笑言：如果佢係我條女就好喇！.周嘉洛、朱敏瀚（朱仔）及吳偉豪同是無綫近年力捧嘅新生代一線小生，三人憑處境劇《愛．回家之開心速遞》及多套重頭劇上位，先後各自奪得「最佳男配角」及「飛躍進步男藝員」，捱咗多年由跑龍套做到男主角。佢哋亦因合作而變成死黨，特別係嘉洛及朱仔，多年前合作拍《痞子殿下》成為好兄弟，嘉洛更因對方而迷上健身，齊齊為健康而戒掉飲酒嘅壞習慣。佢哋視無聊嘅相處日常為男人嘅浪漫，嘉洛更笑言：「如果佢係我條女就好喇！」

嘉洛談到最初對朱仔嘅印象，認為同對方無法做朋友：「最初知佢係公司最Top嘅靚仔、Cool cool哋，本身覺得未必會想同佢做朋友，但圍讀第一日就打破咗，佢笑容好友善、好甜，同我幻想嘅好唔同。」朱仔則說：「之前覺得佢好有Talent，又升得咁快，但最大嘅驚喜係拍一場監獄戲，佢一Take過講咗幾頁紙，大家拍晒手掌，嗰場戲話畀我聽佢真係好勁。」

《痞子殿下》可說是佢哋最辛苦嘅一部劇集，日接夜開工，亦令佢哋第一次嘗到喺公司錄影廠宿一宵嘅滋味。嘉洛話：「嗰陣一齊瞓廠，佢踩得最甘，試過60個鐘冇瞓覺！」朱仔話：「因為要黐頭套，得幾個鐘情願喺公司瞓，兩、三日先返屋企沖個涼。大家輪住踩，個個都瀨晒嘢，永遠有人慘過你，成班人好辛苦但又好開心。」嘉洛亦難忘齊上齊落嘅日子：「嗰種開心係覆蓋咗辛苦，腎上腺素上升，就算唔夠瞓都好享受呢段時間。」

嘉洛與朱仔拍攝《痞子殿下》後再合作《痞子無間道》、節目《約埋班Friend去旅行》及《試真D》等，有說不完嘅話題。嘉洛大爆朱仔靚仔以外鮮為人知嘅戇直一面：「我哋傾好多無聊嘢，其實佢私底下好戇居，有時做Gym操操吓，佢會無啦啦喺度大嗌，幾搞笑，其實意義不明、冇乜重點，就係戇居，有少少男人嘅浪漫。」朱仔則說：「呢方面唔係好多人睇到，得張振朗、關曜儁見過，幾開心我哋4個咁Friend。」

朱仔因拍攝《反黑路人甲》及《拳王》而迷上健身，呢個興趣亦感染咗嘉洛，兩人現在日日見面，日操夜操，齊齊為健康人生而戒酒。嘉洛話：「健身目標真係為咗健康，以前會飲酒，依家就Cut咗，自律搞好自己先，依家成熟咗，轉咗飲水。」三十而立嘅嘉洛，自言年紀大開始思考人生，會同朱仔分享內心感受，亦視對方為學習對象。佢笑說：「佢對我特別包容，當好細佬咁，就算各執己見，都肯聽對方意見，好舒服。如果佢係我條女就好喇，哈哈！」

二人同時備受公司力捧，但並不存在同行如敵國，反而覺得大家嘅演出各有獨特之處。問到下個目標是否劍指「視帝」？嘉洛坦言：「比起攞視帝，更加想同佢哋拍一套好難忘、有意義、有價值、有回憶嘅劇集。」朱仔亦認同：「如果一齊拍加埋出埠就好，過程好重要，而唔係獎項。我哋加埋振朗、Leo可以拍《醉爆伴郎團》，好耐冇劇集講友情，我哋唔使演朋友，真係朋友去拍係差好遠。」佢同樣表示「視帝」唔係終極目標，但樂見有一日大家同台競逐獎項，屆時獎項花落誰家都會替對方高興。TVB