【娛樂新聞】李乘德大馬巧遇黃宗澤 主動擁抱盡顯風度 貫徹「擁抱者」作風.視后胡杏兒嘅老公李乘德（Philip）近日飛抵馬來西亞吉隆坡，準備出席好友楊明與莊思明嘅婚禮。日前佢同友人去當地著名食肆用膳，點知竟然喺現場巧遇老婆嘅舊愛黃宗澤（Bosco）。Philip主動上前打招呼示好，兩人更大方上演「世紀擁抱」，完全破除現任與前度嘅芥蒂。

據網民拍到嘅現場畫面，當時Bosco戴住口罩同漁夫帽，準備隨蘇麗珊步出餐廳VIP房，本來無察覺途經嘅一枱客當中有Philip在座。但Philip展現大方風度，主動企起身同Bosco揮手及握手打招呼。Bosco起初未認出對方，Philip自我介紹後，二人客套問候，更順勢擁抱，場面相當和諧。Philip今次可謂貫徹佢「擁抱者」嘅作風。

Bosco係胡杏兒入行後首位公開承認嘅男友，二人因合作《我的野蠻奶奶》擦出愛火，一度被譽為「金童玉女」。2011年胡杏兒奪視后時，更喺台上發表愛的宣言：「我知自己好難頂，你都好難頂，希望我哋一齊頂住大家。」可惜8年戀情最終於2012年劃上句號。直至2015年，胡杏兒與李乘德拉埋天窗，婚後育有三子，生活美滿。雖然去年李乘德曾因派對攬女風波惹熱議，但佢事後自稱係「擁抱者（Hugger）」，風波亦逐漸淡忘。如今佢遠在大馬巧遇老婆舊愛，照樣熱情大方擁抱，證明佢確實係名副其實嘅「擁抱者」！TVB