黃翠如感謝楊堯茜贈名貴跑車予「蕭哈哈」 好友馬國明幽默：靚過阿蕭揸嗰架

黃翠如 Priscilla Wong 去年3月誕下阿仔「蕭哈哈」，不時喺社交平台曬親子溫馨日常，近月翠如屢傳懷有第二胎，繼5月被影到着鬆身裙肚凸凸疑似懷孕，日前驚喜現身 Edwin Siu 蕭正楠 喺江門舉行嘅巡唱，見佢再度凸腩，翠如幽默式否認懷孕傳聞，話只係件衫攝咗入條褲，同埋最近肥咗。

查實翠如產後出席活動時，曾表示暫時唔打算再追多個女兒湊成「好」字，直言有一個寶寶已經非常滿足，而老公阿蕭亦努力搵奶粉錢，翠如今日喺IG貼出陪阿仔嘅合照，話阿蕭最近不停走來走去工作，阿仔喺等待爸B回來嘅日子，經常指住電話搵爸B，開始知道大人換衫同拎鞋就係要「離家出走」，因此阿仔喜歡搶走翠如出行嘅嘢。

翠如話阿蕭返屋企當天撞正颱風日，阿仔一見到爸爸就爬上去，仔細咁望又攬住阿蕭，令阿蕭甜入心，「無限陪玩，一家團聚😂」，阿蕭陪阿仔玩嗰陣，仲把玩具砲口對準「哈哈」，翠如搞笑稱「留意爸B的手正在用武器對付自己的親生骨肉」。

翠如多謝「二家姐」楊堯茜送架玩具名貴跑車畀「哈哈」，等呢位尿片BB準備推車拆屋，好友馬國明見到就笑稱：「你仔仔架跑車靚過爸爸揸嗰架……🤣😂🤣。」楊堯茜就回覆：「Yeah👍🏻👍🏻揸車帶姨姨兜風❤️❤️❤️」

蕭正楠亦喺社交平台出post，指自己忙咗個567月，終於有時間陪哈哈，冇諗過阿仔咁鍾意玩水，手指仔皺晒皮都唔走，「聽日又要同佢上游水堂，媽媽係脆魚，唔通你係飛魚，同小方叔叔認真傾吓先🤘🏼」。

萧正楠