修咸頓喺今季往績上確實難以被睇好，聯賽取得一和一敗，附加賽首回合作客只能夠悶和對手。而開賽4分鐘就失守，反而令佢哋全力谷出來踢，場面都逐漸佔據上風。曼寧（Ryan Manning）喺左路嘅傳中嘗試搵到射手嘅史超活（Ross Stewart），可惜後者就未有食正部位。兩位係全隊最活躍同最具威脅，其次就係後備入替嘅加拿大射手拿連（Cyle Larin）。比爾（James Bree）喺完半場前進攻左路處理死球到禁區內，曼寧第一下命射被龍門托走，史超活總算把握到機會追和。換邊之後修咸頓繼續加強攻勢，但係包括加時在內米杜士堡喺禁區內三次推跌進攻球員都未有被吹罰十二碼，而附加賽就未有設置VAR，米杜士堡終究要為呢個付出代價。加時下半場，查理斯（Shea Charles）做英雄，左腳長傳到禁區內，費里（Dael Fry）失位漏頂呃埋龍門白賴仁（Solomon Brynn），修咸頓憑藉呢球殺入溫布萊嘅決賽，將會同侯城爭奪最後一個升班資格同埋價值一億英鎊嘅獎金。

米杜士堡除咗入波嘅麥基（Riley McGree），其他球員都唔算太過出眾；三後衛居右，踢過列斯聯同比士篤城嘅艾寧（Luke Ayling）全場都幾多小動作。

德國領隊艾卡特由倒數第五位開始執起教鞭，一路將修咸頓帶到榜四收咧，若果能夠成功升班，又將會成為一個超級勵志嘅故事！

EFLPlayoff修咸頓2-1 米杜士堡Full Time 🏴󠁧󠁢󠁥󠁮󠁧󠁿