馬刺總動員撐Wemby即反彈 ｜忘記西決小心受傷嘅木狼

Wemby歸來，連師父同師兄弟都一齊歸來，馬刺一開波就展現無比決心，加上球證終於睇到越界嘅犯規動作，就算今場外投唔準，馬刺最終仍能大勝一場，重新領先3-2。

Wemby嘅成熟，越超同齡球員，今日在場上並未有過度興奮，亦都冇表露上場被逐嘅憤恨，甚至喺賽後被記者問到被逐嘅感受，佢先係扮聽唔到，然後再思考幾秒，再冷靜應對，果然係從來不露表情嘅冷面石佛嘅最佳傳人。

今場Wemby早早爆發，下半場睇清形勢，更有球奧拉祖雲式傳球，真係不得了。

G6會多一日休息，要到周六先打，到時Viu TV都會有直播，大家留意。

//Thanks El Jefe！

普波域治（Gregg Popovich）來咗，鄧肯（Tim Duncan）、大衛羅賓遜（David Robinson）、真路比利（Manu Ginobili）同艾利洛（Sean Elliot）都來埋，馬刺上下來到主場館，就是要為Wemby及球隊打氣，等佢哋冷靜對敵，一定要攞低呢場重要嘅比賽。喺Wemby第一節已轟入18分下，就算木狼始終緊咬不放，最終仍能以126-97大勝，最重要係靠防守來取得勝利。馬刺重新領先3-2，但受傷嘅狼群只會更可怕，周六嘅比賽，將會係呢季最重要一戰，都肯定係最難打嘅48分鐘。

上仗未能作客取勝，馬刺更有雲班耶瑪（Victor Wembanyama）開踭早早被逐，對球隊上下來講，呢個極可能成為整個系列賽嘅轉捩點，只要稍一不慎，就可能被憤怒衝昏理智。雖然Wemby被逐係理所當然，但佢喺前四場不斷被木狼用盡一切手段來推拉擠撞都係事實。密治莊遜（Mitch Johnson）賽後嘅保護自己言論，並唔係突如其來，而係以Wemby嘅重心極高，下肢力量不足，喺體力化及犯規邊緣嘅防守對抗下，如球證未有針對過份嘅動作吹罰，的確有危機。//

文章擇自- 仙道彬手記🏀