雙方快上快落嘅節奏都幾刺激，護級心切嘅熱刺較主動出擊，不過攻擊端依然浪費唔少機會，下半場放慢節奏反而俾到對手列斯聯唔少反擊機會。獲得最多埋門機會嘅李察利臣只有一次命中目標（4射1中）；左翼嘅泰爾（Mathys Tel）下半場入靚波，同時又犯致命錯誤；龍門嘅堅斯基作出3次關鍵撲救，係球隊未有再增加失分嘅重要功臣；詹士麥迪遜下半場入替令主場球迷一時轟動。

列斯聯喺下半場作出調動之後，反擊嘅威脅明顯有所提高。卡華特利雲攻入今季嘅第13粒入波；補時階段入替嘅朗斯達夫幾乎做奇兵。

呢個結局客隊列斯聯絕對收貨，佢哋亦已成功上岸；相反熱刺主場只係攞得一分，未能把握韋斯咸輸波而擴大優勢，或多或少會埋下點伏筆。

EPL托定咸熱刺1-1 列斯聯 🏴󠁧󠁢󠁥󠁮󠁧󠁿