勞達路馬天尼斯一個入波一個助攻，米希達利恩都有士哥。呢場係意大利杯決賽嘅預演，國際米蘭用安迪迪奧夫踢右翼衛，奧古斯圖踢左翼衛。佢哋喺今屆聯賽取得85球， 單計75分鐘之後取得20個入波，兩項數據都係各隊之冠。拉素連續三季聯賽主場對國際米蘭未能取得入波，19歲嘅意大利新人前鋒（Mattia Mosconi）第一次意甲上陣，係個唔錯嘅信息。

羅馬洛尼拎紅牌，係今季拉素聯賽第八張紅牌，亦都係意甲最多球員被逐嘅一隊。伊薩臣後備入替，有一定嘅威脅力。

華荷域自從11月29號之後第一次喺聯賽正選上陣，開波11秒取得入波，係自從2004/05球季有相關紀錄以來，祖雲達斯喺意甲嘅最快入波。耶廸斯、干斯卡奧同華荷域今季第四次一齊喺聯賽正選上陣。踢 4231 陣式，祖雲達斯嘅運作係比較暢順，麥堅尼嘅優點可以更好地發揮出嚟，甘拜亞素作為左後衛都有好大嘅自由度，盧卡迪利喺中場都有好好嘅發揮。史巴列堤賽後表示球會就續約問題，會同華荷域團隊接觸，盡力留住呢位球員。

萊切教練廸法蘭斯高第八次喺意甲帶隊面對史巴列堤，仍然未贏過；佢哋同維羅納係今季意甲目前入波最少嘅球隊。

意甲第36週賽事賽果-拖連奴2-1 薩斯索羅卡利亞里0-2 烏甸尼斯拉素0-3 國際米蘭萊切0-1 祖雲達斯維羅納🆚科莫（稍後時間進行）基蒙尼斯🆚比薩費倫天拿🆚熱拿亞帕爾瑪🆚羅馬AC米蘭🆚亞特蘭大拿坡里🆚博洛尼亞

Serie A國際米蘭祖雲達斯 🇮🇹