上場馬刺狂勝木狼，艾活士（Anthony Edwards）睇來並唔在意，佢賽後認為，當有主場優勢嘅球隊首戰落敗，之後多數係立即反彈，所以被對方大炒佢依然能夠處之泰然。

Ant man以表現來證明自己所言非虛，今仗重返正選，就攻入32分及有14籃板，並有6次助攻和1次封波；雖然今仗只入咗3球三分，但由第一節開始，佢總係喺完結前射入不可思議嘅高難度三分波，包括完場前23.9秒嘅一球，令木狼追近到108:113，等馬刺明白，木狼從不會放棄。

馬刺千辛萬苦贏下勝仗，最大功臣當然係雲班耶瑪（Victor Wembanyama），美國政府公佈外星人到訪地球細節，暫時冇驚喜；反而來自德州嘅外星人，就再次震驚世人。

今場Wemby打咗37分鐘，上半場已輕鬆攻入15分，但之後面對木狼嘅瘋狂碰撞，有點患得患失，而喺關鍵時刻五犯，更出現信心危機，幸好佢最後能一直留喺場上，並於第四節再轟入16分。末段嘅三分波，令木狼欲守無從，最後以39分、15籃板及5次封波完成比賽。

有時睇波，會以球員角度去理解多一點，所以見上半場哥尼特（Luke Kornet）被列特（Naz Reid）手踭撞開但犯規，就會明白係因佢入侵咗對方嘅圓柱體，呢d地方好難解釋。只係木狼今場有好多犯規邊緣嘅動作，Tony Brothers都冇留意到，小至Wemby封完波就被Ant man拉衫，難以快攻；大至卡斯圖多次被拉手而出界或係被判犯規，都見到馬刺嘅經驗不足。幸好馬刺喺後衛上可以奢侈得有兩套正選，必要時就換上沉穩嘅迪倫夏柏（Dylan Harper）穩住局面。霍斯（De'Aaron Fox）上半場慢熱，下半場搵翻手感，攻入全隊第二高嘅17分，不過一眾後衛群嘅三分全部未能打開，今場入得最多係Wemby嘅三球。

今仗最開心係卡達拜仁（Carter Bryant）打咗8分鐘，雖然防守上好唔習慣，反而進攻上三分兩射兩中，取得6分；一再強調，馬刺要走得更遠，就需要佢嘅力量，尤其係Wemby休息時高度不足，更需要側翼幫忙。密治莊遜（Mitch Johnson）於首節按計劃太早收起Wemby，幾乎鑄成大錯，幸好之後都換人得宜，最後信任Wemby而俾五犯嘅佢留喺場上，可記一功。

終於領先2-1，馬刺小將喺餘下嘅比賽，能否以活力及決心補經驗不足，相當關鍵，下場將係今季最重要嘅比賽。

文章擇自- 仙道彬手記🏀