76人嘅感覺，逐漸與騎士相似，保羅佐治（Paul George）早早打出好表現，但下半場已經乏力，就好似夏登一樣難以堅持到最後；長人恩彼特（Joel Embiid）喺進攻上仍有一定威脅，但防守始終成為弱點，第二節被羅賓遜（Mitchell Robinson）騎喺頭上拆你屋，更成為今場嘅金球。

紐約力搏嘅OG大腿傷勢雖唔算嚴重，暫時係每日觀察名單，但既手持2-0優勢，今場都有條件俾佢休息；頂上正選嘅麥拜迪（Miles McBride）只得3分，反而後備嘅森美特（Landry Shamet）突然上身攻入15分，與羅賓遜一攻一守，成為後備力量。

謝倫賓遜（Jalen Brunson）以完全體姿態繼續交出33分9助攻，布歷捷斯（Mikal Bridges）經過人生低潮後已搵翻信心，今場亦有23分；當76人得分最高係22分嘅奧比（Kelly Oubre Jr.）你就知道佢哋形勢不妙。

領先到3-0後，紐約力搏晉級只係時間問題，下場應該全力爭勝，爭取時間休息，俾OG復出等待東岸決賽。

此外，76人教練紐斯（Nick Nurse）嘅哥哥早前突然去世，返到主場作戰，今場亦有默哀，喺G1後要返屋企奔喪，之後再歸隊，可以想像如何心力交瘁。只希望佢喺比賽之餘，好好休息。

文章擇自- 仙道彬手記🏀