講一講丹麥今晚喺世界盃外圍賽附加賽面對北馬其頓嘅情況- 🇩🇰

而家有幾個問號：第一，卡斯柏舒米高長期養傷，到底邊個今晚會把守最後一關？ 賽前教練列麥並冇明確表態。本來已經退出國家隊嘅朗勞願意出山幫手，但又未必打正選，韋斯咸嘅靴文臣可能擔正，另一位守門員係真達，不過就比較年青應該只會擔任後備。

第二，中堅缺人，由於安達斯基斯甸臣、積及安達臣同維斯迪加特都缺陣，阿仙奴嘅中場諾迪加特有機會移後踢中堅，據丹麥媒體報道，國家隊助教艾加喺操練過程當中同佢有特別多溝通，似乎可見端倪，佢嘅拍檔有機會係維羅納嘅域陀尼路臣或者係 鶴斯貝治，後者嘅可能性稍高一啲。

第三 ，左後衛美利夠唔夠狀態踢正選？之前休息咗五個月，最近兩個禮拜先復出。

第四，唐斯加特近期受到膝頭哥問題影響，上陣時間相對比較少，上個禮拜亦都缺席賓福特對列斯聯嘅比賽 ，老將艾歷臣係另一個選擇。

另外，丹麥發佈咗最新作客波衫，感覺至少比主場嗰件好啲，有國旗式樣嘅元素。