古天樂被封「傳說之王」！多部存货等到發霉 海報終於出土.古天樂向來拍戲拍到冇停手，不過佢嘅作品入面，有唔少都係拍完好耐都未上畫，好似《尋秦記》咁，等足6年終於去年底見得人，仲要錄得近億票房，認真犀利！除咗《尋秦記》，古仔仲有一堆戲排隊等緊出街，包括《誰變走了大佛》、《一線生機》、《守闕者》同《偵戰》等等，儲埋一堆，真係可以封佢做「傳說之王」！

講到等得最耐，除咗《尋秦記》，《一線生機》都唔弱，2021年已經拍完，到𠵱家足足等咗5年都未見影，隨時挑戰《尋》片嘅「冠軍寶座」！至於《誰變走了大佛》，係古仔同《葉問》導演葉偉信繼《殺破狼‧貪狼》之後再合作，聽個班底都知吸引。其實早喺2023年已經出過預告，但就一直只聞樓梯響。之前古仔再被問到呢套戲，佢都忍唔住親解之謎，話上畫呢家嘢唔係佢一個人話事，仲要配合好多因素，想快都急唔嚟。

不過古仔 fans 都唔使灰心住，事關佢同謝君豪、盧慧敏主演嘅《偵戰》，據聞有望今年上映！喺尋日（17日）開鑼嘅《香港影視娛樂博覽2026》入面，《偵戰》嘅先導海報終於出土，仲擺咗喺電影公司攤位嘅當眼處，明顯想吸引世界各地嘅買家，幫手開拓海外市場，睇嚟今次係嚟真㗎喇！

順便一提，由吳彥祖、劉俊謙主演嘅《寒戰》前傳《寒戰1994》，今日都會喺影視展見人，仲話預計今年10月1日上映，而《寒戰1995》就計劃明年推出。雖然粉絲恨睇郭富城同梁家輝歸隊，但按時間線嚟睇，今集應該唔會有佢哋份。

另外網上流傳梁朝偉將會接拍新戲《梟雄》，故事背景係民國時代，傳聞佢會演斧頭幫幫主，聽落都幾有新鮮感，唔知到時出到嚟又會係咩效果呢？